100 VJET SHTET
Dialogu në krizë?
01.03.2013 | 08:23
Propozimi i BE’së, që çështja e Veriut të zgjidhet duke krijuar Asociacionin e Komunave me shumicë serbe, po has në vështirësi. Kryeministri i Serbisë, Ivica Dacic, ka thënë se refuzimi i Prishtinës që ky mekanizëm të ketë kompetenca ekzekutive po e çon dialogun drejt krizës. Dacic ka përsëritur se mënyra më e mirë për zgjidhje do të ishte ndarja e Kosovës.

Beogradi duket se nuk është i kënaqur me rrjedhën e bisedimeve në Bruksel, sidomos me temat që ndërlidhen me çështjen e Veriut.

Kryeministri serb, Ivica Dacic, ka thënë se refuzimi i Prishtinës për t’i dhënë kompetenca Asociacionit të Komunave me shumicë serbe ka futur në krizë dialogun.

Ai ka thënë se tash nuk e di se në çfarë drejtimi do të shkojë dialogu, pasi përfaqësuesit e palës kosovare as që duan të bisedojë që t’i japin kompetenca ekzekutive, siç i quan ai, Bashkësisë së Komunave serbe në Kosovë.

"Serbia është treguar korrekte. Unë nuk di çka mund ne të propozojmë më, pos ta njohim pavarësinë e Kosovës dhe të themi `neve nuk po na respektohet asgjë, bëni çfarë të doni `, ka thënë Dacic.

“Ne pajtohemi vetëm në një gjë, e kjo është se problemi i paralelizmit të institucioneve mund të zgjidhet me formimin e bashkësisë së komunave serbe . Mirëpo, ata fare nuk dëshirojnë të flasin mbi kompetencat ekzekutive për atë bashkësi, për ata kjo temë absolut është papranueshme, siç janë për ne disa tema tjera”, ka thënë Dacic.

Takimi i radhës pritet të zhvillohet më 4 mars në Bruksel. Zyrtarë në BE kanë thënë se kësaj here palët do të qëndrojnë vetëm një ditë në kryeqytetin europian.

Pavarësisht se ka theksuar se dialogu është në krizë, Dacic nuk ka thënë se nuk do të shkojë në përballjen e re me Thaçin.

"Ky është moment kyç, të gjithë duhet të jemi unikë rreth asaj që po kërkojmë”, ka thënë Dacic.

Ai ka paralajmëruar bisedime edhe me serbët e Kosovës.

Kreu i Qeverisë së Serbisë ka thënë se edhe më tej konsideron se ndarja e Kosovës dhe përkufizimi me shqiptarët e Kosovës është zgjidhje më e mirë.

“Nuk më lejojnë më të flas as për ndarjen as për përkufizimin, edhe pse konsideroj se kjo është zgjidhje më e mirë dhe e vetme e mundshme, respektivisht e vetmja që është e pranueshme edhe për serbët edhe për shqiptarët”, ka theksuar Dacic.

“Në BE vazhdimisht flasin se nuk e duan Republika Srpska’ në Kosovë, por nuk e dimë se kush po e përmend fare këtë”, ka thënë Dacic.

Pala kosovare ndërkaq ka pranuar zgjidhjen e ofruar nga Bashkimi Europian për krijimin e asociacionit të komunave.

Por, Kryeministri Thaçi, edhe pse ka filluar ta promovojë këtë si zgjidhje, ai ka frikë se ky mekanizëm mund të ketë kompetenca që dëmtojnë sovranitetin e vendit.

Për këtë ai ka zhvilluar një bisedë telefonike me Zëvendëssekretarin amerikan të Shtetit, William Burns, nga i cili ka kërkuar që asociacionit të mos ketë kompetenca ekzekutive.

“Kjo do të thotë që kompetencat e zgjeruara ekzekutive të komunave lokale serbe nuk mund të transferohen tek asociacionet, sepse kjo do të përbënte një nivel të tretë të Qeverisë e cila do të minonte Kushtetutën tonë dhe rendin e brendshëm shtetëror. Prandaj, unë fuqimisht ju lus për mirëkuptimin dhe mbështetjen tuaj që ta shmangni këtë”, i ka thënë Thaçi Burns’it.

Ndryshe, Presidenti i Serbisë, Tomislav Nikolic, të enjten ka takuar ambasadorin amerikan në Beograd, Michael Kirby, të cilit i ka thënë se ndihma e SHBA’së do të ndikojë që të gjendet një zgjidhje për këto çështje. /express/


Nëse tashmë nuk e ke një faqe të internetit për biznesin tuaj apo nuk je i kënaqur me atë që ke, na kontakto që të flasim për ...
Alba-Soft ofron shërbime të HOSTING me të gjitha elementet për të përmbushur plotësisht nevojat e klientëve të saj.
Mbi 500.000 vizitorë në muaj. Ofrojmë hapësira reklamuese në faqe shumë të vizituara si: Lajmëtari.com, Albanologji.com, ...
Jemi të specializuar në përkthim softuerësh, interpretim, faqosje kompjuterike, titrim dhe këshillim kulturor duke u kujdesur më ...
Ky portal mirëmbahet nga kompania albasoft.al. Materialet dhe informacionet në këtë portal nuk mund të kopjohen, të printohen, ose të përdoren në çfarëdo forme me qëllim përfitimi, pa miratimin e drejtuesve të albasoft.al.
Të gjitha të drejtat janë të rezervuara © 2012 Portali Gjuha Shqipe
Tiranë | Prishtinë