Digjitalizimi i gjuhës shqipe në Mal të Zi

Sot në komunën e Tuzit është prezantuar projekti “Digjitalizimi i gjuhës shqipe në Malin e Zi”. Në këtë aktivitet është paraqitur edhe maketi i Librit të madh të gjuhës shqipe. 

Aktiviteti është mbajtur në Gjimnazin e Tuzit dhe është organizuar nga Këshilli Kombëtar i Shqiptarëve. 

Ernest Culaj, drejtor i kompanisë softuerike “Albasoft”, ka shpalosur projektin para shumë personaliteteve pjesëmarrëse, që nga politikanë, intelektualë, shoqëri civile e deri te nxënës dhe qytetarë të të gjitha trevave shqiptare në Mal të Zi, të cilët kishin shprehur interesim për të qenë pjesë e kësaj ngjarjeje. 

Para të pranishmëve drejtori Culaj përmendi se me projektin softuerik “Kulla e shqipes 2.0” të gjithë shqiptarët do të kenë mundësi ta mësojnë dhe ta shkruajnë drejt dhe lehtë gjuhën shqipe. 

Culaj vlerësoi se softuerët e zhvilluar nga “Albasoft-i” kanë luajtur rol të madh në ngritjen e nivelit të të shkruarit shqip dhe në përparimin e gjuhës shqipe gjithësisht. Përmes shkarkimit dhe instalimit të paketës softuerike “Kulla e shqipes”, vijoi Culaj, ofrohen të digjitalizuara: morfologjia (përmes Morfologjisë digjitale), drejtshkrimi (përmes Drejtshkrimorit), sintaksa (përmes Sintaksorit), leksiku - fjalori shpjegues më i pasur i gjuhës shqipe (përmes Fjalorit të madh të gjuhës shqipe), fjalori sinonimik (përmes Sinonimikut), mësimi i gjuhës te fëmijët (Fillestarja digjitale) e shumë softuerë të tjerë për gjuhën shqipe. 

Teksa ka paraqitur maketin e Librit të madh të gjuhës shqipe, Culaj e ka çmuar këtë krijimtari si të parën në llojin e vet. Tutje, Culaj ka folur për dimensionet dhe përmbajtjen e librit, duke bërë të ditur se përbëhet nga 8 mijë faqe të madhësisë 2 metra gjatësi dhe 1.2 metra gjerësi, të barasvlershme me 300 mijë faqe A4. 

Pjesëmarrësit e këtij organizimi shfaqën interesim të madh për t’i përdorur të gjithë softuerët e gjuhës shqipe, ndërsa Librin e madh e shihnin si një përmendore të gjallë të gjuhës shqipe.  

Prezantime të tilla të projekteve të zhvilluara nga Qendra për Edukim dhe Përparim në bashkëpunim me Albasoft-in do të vazhdojnë edhe në treva të tjera shqiptare.